Gardacostas de Galicia comisou 372 quilos de marisco e peixe e preto de 1.300 aparellos ilegais (nasas e cacharros para a campaña do polbo) noutra semana contra o furtivismo en distintos puntos do litoral galego. O balanzo dos operativos de vixilancia e loita contra do furtivismo realizados entre o 17 e o 23 de agosto saldouse coa tramitación de 31 actas de presunta infracción e incautación.
Nas operacións participaron unidades operativas de Ferrol, Portosín, Muxía, Vigo e Servizos Centrais, tanto mediante patrullas terrestres como a bordo de diferentes embarcacións do Servizo. Os controis abrangueron zonas das trías de Arousa, Ferrol, Pontevedra, Vigo e Muros – Noia, así como distintos puntos do litoral de Camariñas, Corcubión e O Ézaro.
Dáse a circunstancia de que a maior parte dos aparellos ilegais incautados estaban destinados a seren utilizados na captura de polbo, unha especie de cefalópodo ben escasa nas campañas deste ano e que, segundo distintas fontes está a ser capturada en cantidades nunca acadadas ata o de agora nas costas británicas.
Nas incautacións levadas a cabo en Galicia é precisamente a do polbo a máis importante: 269,5 quilos, seguida de 44,1 quilos de nécora, 25 de navalla, 11,5 de de centola, 7 de congro, 6 de ameixa xapónica moi inferiores de santiaguiño e camarón.
A práctica totalidade do marisco e peixe comisado que permanecía vivo foron devoltos mao mar para preservar os recursos mariños e colaborar na actividade profesional do sector pesqueiro e marisqueiro galegos.
Semella incomprensible a existencia desta actividade furtiva que, se existe, é grazas en grande medida a que hai un mercado que contribúe á súa pervivencia e a que somos os propios consumidores os que a alentamos, sabedores de que pagamos menos polo que consumimos en bares e restaurantes porque estes se subministran de peixe e marisco obtidos ilegalmente. Porque, aínda que o neguemos tallantemente, os consumidores somos sabedores de cales son os locais nos que se pode consumir a prezos nunca xustificados ese peixe ou marisco nunca comprado en prazas ou mercados.
