A Asociación de Persoas con Discapacidade da Bisbarra de Muros (ADISBISMUR) celebrou este sábado 1 de agosto a IV Festa Benéfica dos Callos, unha cita solidaria con epicentro na Horta do Muíño e que tivo novamente o obxectivo de reunir á veciñanza arredor dunha xornada de convivencia para apoiar o labor que desenvolve a entidade.
A programación contou cun amplo apartado musical, encabezado polas actuacións de Chiña e Pablo Balseiro, ás que se sumaron Os Jaitas Blue, Pandereteir@s do Tremuzo, Aires de Broña, Abelleira e Punto, ademais de charanga e DJ, que animaron a festa ao longo do día.
A degustación contou con máis 1.500 racións preparadas e incluíu callos, pan, bebida, sobremesa e café.
A xornada completouse con diferentes actividades para todas as idades, entre elas unha andaina que iniciará ás 10 horas, pachangas de fútbol, pintacaras e inchables, co propósito de ofrecer un espazo de encontro para familias e persoas participantes.
Na cita participou a conselleira de Política Social e Igualdade, Fabiola García, quen puxo en valor o papel de ADISBISMUR, que “suma máis de catro décadas traballando para mellorar a calidade de vida das persoas con discapacidade, favorecer a súa autonomía e avanzar cara a unha sociedade cada vez máis inclusiva”. Ademais, a conselleira, que estivo acompañada do alcalde de Outes, Francisco Calo, e do presidente da entidade inclusiva, Ramón Sestayo, tamén quixo agradecer a implicación das preto de 200 empresas colaboradoras e de todas as persoas voluntarias que fan posible este evento solidario.
A celebración desta cuarta edición da Festa Benéfica dos Callos contou coa colaboración e implicación dos concellos de Outes, Muros, Carnota e Mazaricos, ademais dun amplo número de empresas e establecementos da comarca, cuxo apoio fai posíbel cada ano a organización desta iniciativa solidaria.
Todos os fondos recadados nesta festa gastronómica serán destinados tanto para a nova residencia que prevén abrir para o ano que vén como tamén para actividades e renovación de material do centro de atención diúrna que a entidade ten en Valadares (Outes), ao que acoden de luns a venres 52 persoas con discapacidade e 22 profesionais.
