O negocio é a causa máis evidente do desmantelamento da sanidade pública, por parte dos responsables da Consellería de Sanidade da Xunta de Galicia. Os nosos gobernantes son conscientes de que ás persoas nos preocupa a nosa saúde e a dos seres queridos, por iso se se demoran en concertarnos unha cita ambulatoria ou hospitalaria ou ben en realizar unhas probas médicas urxentes e necesarias tenderemos a acudir á sanidade privada. Con ese medo xogan, coa saúde das persoas máis vulnerables que non poden custearse unha asistencia sanitaria particular.
Cada vez menos médicos e persoal sanitario; máis demoras na concesión das citas para a atención primaria; meses e meses á espera de probas médicas para o diagnóstico; tardanza nas operacións cirúrxicas; carencia de camas e habitacións para hospitalización. É dicir, unha serie de anomalías e carencias que están precarizando á sanidade pública. A Sanidade atópase instalada, desde hai moito tempo, na Unidade de Coidados Intensivos.
Por outra banda, as queixas ou denuncias, a través do servizo de atención ao paciente, teñen pouca eficacia xa que nin as contestan ou ben se limitan a prometer unha maior dilixencia nas solucións á problemática que se traslada nas follas de reclamacións ante o SERGAS.
