A praza do Emigrante acollerá do 7 ao 9 de agosto unha nova edición do Comercio na Rúa, unha iniciativa promovida pola Concellaría de Promoción Económica da Pobra do Caramiñal coa que se busca dinamizar a actividade comercial e poñer en valor a ampla e variada oferta dos establecementos participantes.
A presentación da iniciativa celebrouse este martes 4 de agosto no establecemento FinaCampaña, coa participación da concelleira de Promoción Económica, Amparo Cerecedo, e do xerente do comercio, Eduardo Dorgambide, quen destacaron a importancia de impulsar accións que favorezan a visibilidade do pequeno comercio e animen á veciñanza e ás persoas visitantes a mercar no comercio de proximidade.
Téxtil, complementos, artesanía e outros produtos serán algunhas das propostas que o público poderá atopar durante estas tres xornadas, nas que os comercios sairán dos seus locais para achegar os seus artigos á veciñanza e ás persoas que visitan a localidade durante o verán.
A iniciativa, como o seu propio nome indica, consiste en sacar o comercio á rúa, creando un espazo común no que os establecementos poidan amosar a súa oferta nun ambiente diferente e próximo. Neste sentido, dende a Concellaría de Promoción Económica incídese en que “non se trata dunha feira de estocaxe, senón dunha proposta de dinamización comercial que pretende dar visibilidade ao pequeno comercio, favorecer o contacto directo coa clientela e impulsar as compras nos establecementos participantes”.
O evento contará coa presenza de comercios locais de diferentes sectores, principalmente vinculados ao téxtil, así como con establecementos procedentes doutros municipios e cunha destacada representación da artesanía. Deste xeito, o Comercio na Rúa conformará unha oferta diversa, na que se combinarán produtos e propostas de diferentes estilos, contribuíndo a crear un espazo atractivo tanto para a veciñanza como para as persoas que se acheguen á Pobra durante esas datas.
Os postos instalaranse na praza do Emigrante cunha coidada presentación, recreando a estética e a identidade dos propios establecementos e permitindo que o público coñeza de preto os produtos e as propostas que ofrecen.
A celebración terá lugar do 7 ao 9 de agosto. O horario de apertura será o venres 7, de 19.00 a 23.00 horas, mentres que o sábado 8 e o domingo 9 permanecerá aberto de 11.00 a 23.00 horas.
Os comercios participantes nesta edición serán Burbujas, FinaCampaña, El Armario de Mi Amiga, El Armario de Alia e Arte Creativa.
Con esta nova edición, a Concellaría de Promoción Económica continúa apostando por iniciativas que contribúan a dinamizar a actividade económica local, reforzar a visibilidade do pequeno comercio e aproveitar o incremento da afluencia de persoas durante os meses de verán para impulsar as compras de proximidade.
