O festival Viladomar –Máis alá dos muros– pechou a súa edición de 2026 coa incorporación de tres novos murais ao museo ao aire libre que se constrúe en Rianxo desde 2018. As intervencións de Lula Goce, Alejandro Mosquera e Agustina Shuan parten de historias e símbolos estreitamente vinculados á vila.
Segundo informaron dende a organización do certame (Ondiñas Mainas en colaboración co Concello), as tres obras propoñen diferentes formas de achegarse á memoria e á identidade de Rianxo desde a creación contemporánea. Así, indicaron, “a mirada feminina e mariñeira de Lula Goce, a reinterpretación xeométrica da tradición oral de Alejandro Mosquera e a conexión entre Galicia e Arxentina plantexada por Agustina Shuan amplían un percorrido artístico que xa forma parte da paisaxe urbana e rural do concello”.
Lula Goce, unha das muralistas galegas con maior proxección internacional, presenta en Nabia a figura dunha rianxeira, muller do mar e símbolo de afouteza. A obra rende homenaxe ás xeracións de mulleres que sostiveron as súas familias e participaron activamente na vida marítima.
O título remite a Nabia, deusa da mitoloxía galaico-lusitana asociada ás augas, á fertilidade e á protección das comunidades. Venerada polos antigos pobos do noroeste da Península Ibérica, a súa figura aparece vinculada aos ríos, ás fontes e a outros espazos naturais considerados sagrados, simbolizando a vida, a protección e a renovación.
Arredor da protagonista medran flores e vexetación autóctona que conectan a obra coa riqueza natural de Galicia e convidan a reflexionar sobre a nosa relación coa contorna. Entre elas aparecen criaturas híbridas e mitolóxicas que representan a soidade, os medos e o mundo interior, e lembran a importancia de vivir en equilibrio coa natureza e con nós mesmos.
A artista constrúe a imaxe desde o debuxo e o detalle inicial ata chegar a pinceladas máis abertas e libres. O resultado é unha intervención monumental na que a figura feminina, o mar e a natureza se integran nun universo poético e facilmente recoñecible.
Goce chegou a Viladomar poucos días despois de rematar en Baiona o mural máis grande realizado ata o momento pola artista. A súa traxectoria levouna a pintar en países como Xapón, Bélxica ou Estados Unidos. Durante o proceso de creación en Rianxo contou coa asistencia de Claire Nickols.
Pola súa banda, Alejandro Mosquera recupera en As Tres Mouras unha lenda vinculada á fervenza do Pozo Bastón. A obra representa tres mouras que intentan saír da auga e camiñan cara á luz, co cabelo longo e un xesto dramático que lle confire á escena unha atmosfera case relixiosa. Na parte inferior, un home lanza tres bolos de pan para liberalas. Porén, un deles está mordido, o que provoca que unha das mouras quede coxa, tal e como relata a lenda.
A paisaxe natural incorpora símbolos e elementos propios do lugar, reinterpretados desde unha linguaxe fresca e contemporánea. A xeometría domina tanto a estrutura xeral da obra como a construción das figuras e dos seus vestidos.
Con esta intervención, o artista traslada ao espazo público un relato da tradición oral de Rianxo e achégao ao presente a través dunha nova lectura visual.
Con Ondas, Agustina Shuan rende homenaxe á emigración e á estreita relación histórica entre Rianxo e Arxentina, un vínculo que tamén atravesa a propia historia da artista.
A protagonista da obra é a súa particular versión da Rianxeira, representada mirando cara ao outro lado do Atlántico, cara ao país no que naceu a célebre canción e no que Castelao viviu durante o seu exilio. A través de elementos cargados de simbolismo, o mural conecta as dúas beiras e fala da distancia, da memoria e dos vínculos que permanecen a pesar da emigración. A intervención ocupa un edificio de tres plantas e constitúe o primeiro mural de gran formato realizado pola artista, que contou coa colaboración de Diego Vites durante a súa execución.
Agustina Shuan leva así ao espazo público unha historia que une Rianxo coa súa propia biografía e constrúe unha imaxe contemporánea arredor dunha das figuras máis recoñecibles da cultura popular galega.
Un festival compartido coa veciñanza
A creación dos tres murais desenvolveuse ao longo da semana e permitiu seguir en directo o proceso de traballo dos artistas. O programa completouse cunha xornada de actividades arredor da arte, do patrimonio e do mar, pensada para públicos de diferentes idades.
Entre as propostas desta edición estivo a clase maxistral de mural con vexetais impartida por Camilo Seira, na que as persoas participantes crearon colectivamente a figura dunha Rianxeira con musgo, así como varios roteiros teatralizados por Rianxo.
A implicación da veciñanza estivo igualmente presente no mural impulsado xunto a As Púrpuras, cuxo proceso de creación se abriu á participación do público.
A edición rematou coa Festa na Praia de Tanxil, celebrada en colaboración co festival Rock in Rian, como peche dunha semana na que a pintura, a música e as actividades compartidas ocuparon diferentes espazos de Rianxo.
As novas obras súmanse ás 23 intervencións realizadas desde o nacemento de Viladomar en 2018. “En conxunto, conforman un percorrido aberto durante todo o ano que permite descubrir distintos lugares e historias de Rianxo a través do muralismo galego”, informou a organización do certame.
