O director de Turismo de Galicia, Xosé Merelles, acompañado polo delegado territorial da Xunta en Pontevedra, Pablo González, supervisou este martes 7 de xullo as obras de mellora da contorna das Torres de Catoira que incluíron entre outras actuacións a creación dun punto de información turística así coma accións de mellora da accesibilidade ao monumento, declarado Ben de Interese Cultural (BIC).
As actuacións están enmarcadas no Plan Xacobeo Next Generation, cofinanciado pola Unión Europa a través dos Fondos do Mecanismo de Recuperación e Resiliencia, no que a Xunta investiu 22,7M€ para rehabilitar un total de 10 BICs da comunidade de titularidade pública.
Máis polo miúdo, o orzamento total destinado á rehabilitación do conxunto monumental Torres de Oeste de Catoira foi de máis de 400.000 euros, unha cifra que foi destinada a varias actuacións, como a creación dun punto de información turística e un proxecto de recreación virtual que permite ao visitante achegarse á época das invasións normandas.
Outra das accións ás que se destinou o investimento consistiu na iluminación do complexo arquitectónico. Ademais, completáronse outras actuacións que permitiron mellorar o recinto, o acceso ao mesmo e, en xeral, as infraestruturas turísticas do conxunto.
As Torres de Oeste, de orixe prerrománica, están localizadas na desembocadura do río Ulla. Foron declaradas Monumento Histórico-Artístico en 1931, e posteriormente recoñecidas como Ben de Interese Cultural.
O conxunto é un símbolo de Catoira e o escenario central da Romaría Vikinga, celebración que recrea o desembarco normando e Festa de Interese Turístico Internacional desde 2002. Estímase que cada ano reúne a máis de 50.000 persoas.
