A deputada do PSdeG no Parlamento de Galicia, Paloma Castro, esixiu á directora xeral de Pesca que “fixe unha data concreta para pagar as axudas pendentes ás persoas mariscadoras de a flote da ría de Arousa”, xa que, segundo dixo, “levan nove meses sen poder traballar e, segundo denunciou, a Xunta aínda non lles pagou nin un euro”.
Castro sinalou que o pasado 26 de setembro a Consellería confirmou o peche durante seis meses dos bancos de libre marisqueo de Cabío, Bohído e Lombos do Ulla, os máis importantes da ría.
“A xustificación foi o sobreesforzo extractivo e a perda de biomasa e o sector aceptou a medida, pero puxo unha condición clara: sen garantías sociais, o peche é directamente unha condena para as familias que viven diso”, sinalou, lembrando que “na ría de Arousa hai entre 1.000 e 1.200 familias que dependen do marisqueo a pé, e entre 150 e 300 máis que viven do marisqueo a flote; e a iso hai que sumar quen traballa arredor da actividade: transporte, xeo, venda, subministracións”. A deputada sinalou que “case dez meses despois, nin plan de axudas, nin calendario de pagamentos, nin compromiso firme cos profesionais afectados”.
Lembrou que o Diario Oficial de Galicia publicou o 6 de abril a orde que regula estas axudas, dotada con dous millóns de euros e co-financiada nun 70% polo Fondo Europeo Marítimo, de Pesca e de Acuicultura (FEMPA). Porén, dixo que “catro meses despois da publicación da orde, o diñeiro segue sen chegar ás persoas afectadas”.
A deputada tamén dixo que a Xunta “deriva as axudas a mecanismos estatais, como o Goberno central ou o Instituto Social da Mariña, en lugar de asumir competencias e medidas sociais propias”.
