O alcalde de Lousame, Esteban Ares García, e a concelleira de Cultura, Silvia Agrafojo Filgueira, presentaron o programa de Actividades de Verán 2026. Sinalaron que “este vai ser un verán moi dinámico en Lousame, onde imos tocar todos os ámbitos con actividades culturais e deportivas dirixidas a todo tipo de público, sobre todo infantil”.
A programación inclúe sete actividades para os meses de xullo e xullo: cursos de natación, o BoloFest Lousame, os campamentos do Verán Activo, dúas sesións de Noite de Cine, cursos de inglés, bibliopiscina e Festa de Despedida das actividades de verán.
Os cursos de natación arrincaron esta mesma semana na Piscina Municipal de Lousame, cun total de 64 nenos e nenas maiores de 4 anos. Uns cursos que se desenvolverán ata o mes de agosto en seis grupos de idade, con dúas sesións semanais. A maiores, durante os meses de xullo e agosto a Piscina Municipal acollerá un servizo gratuíto de Bibliopiscina, dirixido polo voluntariado local, para que “cando a rapazada se aburra un pouco da auga teña tamén un punto onde ler, colorear ou facer outro tipo de actividades de lecer, dándolles así un pouco de respiro ás familias”, apunta o técnico municipal de Deportes, Germán Romero.
Verán Activo 2026
Indicaron que este venres 3 de xullo abriuse o prazo de preinscrición nos campamentos do Verán Activo 2026 para menores empadroados en Lousame. Uns campamentos dirixidos a nenos e nenas, de entre 6 e 15 anos de idade, que terán lugar do 3 ao 7 de agosto, en horario de 9:00 a 20:00 horas, co polideportivo da Silva como epicentro das actividades.
“Mantemos o horario de todo o día porque á xente lle gusta, aínda que se algunha familia precisa deixar ao pequeno antes das nove da mañá tamén poderá facelo dende as 8.15 horas”, indicou Silvia Agrafojo.
O prezo dos campamentos é de 45 euros e inclúen un amplo e variado programa de actividades deportivas e de auga, con inchables, saídas á piscina, sendeirismo… “e este ano recuperamos as excursión á praia”, adianta Esteban Ares.
Noites de cine
En colaboración coa Rede Cultural da Deputación da Coruña, o Concello de Lousame ofrecerá dúas sesións de Noite de Cine: Sirat, premiado filme de Oliver Laxe, o 12 de agosto no Corral de Arriba de Camboño; e Dragonkeeper, filme de animación o 19 de agosto no exterior da Casa da Cultura. “Queremos sacar as Noites de Cine da Casa da Cultura e comezar a levalas polas parroquias. Nesta primeira ocasión será Camboño, na contorna do palco da música, e iremos buscando novos lugares para próximas sesións”, explica Silvia Agrafojo.
Nesa primeira quincena de agosto está previsto tamén a celebración das Leisure Activities, cursos de inglés gratuítos para a rapazada de Lousame no local social do Sanguiñal. Unha actividade que está pendente de fixar a data definitiva, xa que os cursos son impartidos polas voluntarias europeas, que chegarán nos próximos días a Lousame.
A programación especial de verán pecharase o 28 de agosto cunha gran festa de despedida das actividades na Piscina Municipal de Lousame.
