A iniciativa da OPP83 converteuse nun gran escaparate gastronómico para achegar ás novas xeracións este peixe branco de calidade garantida.
A cidade de Ribeira volveu demostrar este venres o seu potencial gastronómico e o seu vínculo indisolúble co mar. A OPP83 Cooperativa Gallega del Mar Santa Eugenia triunfou de pleno na súa aposta por fomentar o consumo de peixe local entre a poboación ao repartir 1.000 racións gratuítas de Lirio de Ribeira preparadas ao máis puro estilo fish&chips, que se esgotaron en menos de dúas horas diante dun público entusiasta.
O punto de encontro situouse nas inmediacións do Centro de Deportes de Raqueta Santa Uxía, xusto fronte á praia de Coroso. Alí, o catering Chicolino encargouse de transformar este peixe branco nunha proposta crocante e atractiva que encandilou a centos de veciños e visitantes. Para completar a xornada, os asistentes recibiron pai-pais explicativos coa receita do prato e neveiras de praia de agasallo para combater a calor do verán.
Innovación para seducir á mocidade
O éxito da convocatoria superou as expectativas da propia organización. A xerente da OPP83, María José Casais, amosouse moi satisfeita coa resposta obtida e subliñou o obxectivo central desta campaña de promoción.
Ao acto de apertura asistiron representantes institucionais como o subdirector xeral de Valorización de Mercados da Xunta, Julio César García Varela, que salientou a importancia de «poñer en valor a calidade do sector pesqueiro directamente no consumidor»; o concelleiro do Mar de Ribeira, Fernando Abraldes, quen destacou o orgullo mariñeiro da localidade; a xefa do Distrito Marítimo, Leire Blanco, e o presidente da Cofradía da Dorna, Álex Nespereira.
Un peixe de marca con frescura récord
A marca Lirio de Ribeira, recoñecida desde o ano 2022, garante un produto de extraordinaria calidade grazas a unha loxística e manexo rigorosos: dende que o peixe se pesca no barco ata a súa chegada a porto transcorren menos de 7 horas, asegurando unha frescura e trazabilidade óptimas.
Esta degustación encádrase no Plan de Produción e Comercialización (PPeC 2026) da OPP83, cofinanciado pola Xunta de Galicia e o fondo europeo FEMPA, coa meta de abrir novos hábitos de consumo e consolidar este peixe de marca nas mesas galegas.
