O BNG de Outes proxectou diferentes proxectos para A Serra “libres de formigonadas”, nas súas palabras. Trátase, sinalan, “dun plan que é unha alternativa a prol da seguridade viaria, de máis zonas verdes, de novas prazas de estacionamento e de máis vivenda pública de alugueiro accesíbel no centro da vila”. A proposta foi presentada no pasado pleno e, segundo informa a agrupación, é unha opción contraposta aos investimentos previstos polo Goberno municipal do PP para a contorna da Horta do Muíño. Dende a formación consideran que “os preto de 370.000 euros previstos para dúas actuacións de formigonado deben destinarse a proxectos que respondan ás necesidades reais da veciñanza e melloren a calidade de vida no núcleo urbano”.
Fronte a esta proposta, o BNG aposta por “redistribuír o investimento para executar actuacións que melloren de maneira efectiva o centro urbano de Outes”. O proxecto nacionalista inclúe a apertura ao público da parcela do hórreo da Horta do Muíño co posicionamento de bancos e arborado, un espazo de estancia para a veciñanza.
Asemade, a parcela lindeira ao Muíño na avenida de San Campio, cederíase á Xunta de Galicia para poder construír vivenda pública de alugueiro accesíbel, aliviando o mercado da vivenda en Outes. Segundo Anxo Núñez, “a parcela que o PP quere converter nun aparcadoiro é unha das poucas parcelas urbanizábeis que quedan no centro da vila. O máis intelixente é poñela ao servizo dun problema real como é o acceso á vivenda, facilitando a súa cesión á Xunta para construír vivenda pública de alugueiro e fixar poboación no noso concello”.
Critica tamén que o Goberno do PP pretenda investir 189.999,52 euros “para asfaltar o principal acceso á Horta do Muíño e 180.009,70 euros na creación dun novo aparcadoiro a escasos metros do estacionamento do Froiz”. Estamos a falar, di, “de máis de 6.000 euros por cada nova praza de aparcamento”.
E engade: “O PP pretende gastar case 180 mil euros para crear un aparcadoiro que apenas terá utilidade un día ao ano, cando xa existen máis de 200 prazas de estacionamento na contorna da avenida de San Campio. É claro que ese non é o mellor uso dos cartos públicos, xa que non atende a ningunha necesidade comprobada cun debido estudo técnico nin á demanda veciñal”, afirma o portavoz municipal do BNG, Anxo Núñez, apuntando que “o importe resultante diminuiría e podería aplicarse a outras prioridades da contorna como a creación de novas beirarrúas no Conchido e a Escola de Música e entre o novo tanatorio do Bosque e o IES Poeta Añón, así como a ampliación do aparcadoiro situado xunto ao Centro de Saúde, incorporando máis de 30 prazas e urbanizando a contorna.
