Era sabido: “Junts”, o partido dos postconverxentes cataláns, non é un socio fiable porque, como di o vello refrán, “de caste lle ven ao galgo”.
Ao igual que outros partidos do arco parlamentario español, Junts ten unha longa e histórica tradición no senso de provocar a inestabilidade daquelas organizacións políticas ás que, nun momento determinado e favorable á súa liña dereitista catalanista, apoia. Provocando moitas veces tal inestabilidade, tenta rendibilizar a mesma para aparentar ser máis grande. Sábeno ben os socialistas cataláns, o PP, o desaparecido “Ciudadanos”, ERC. Junts é o que o corpo social do partido quere: gañar, gobernar, aínda que sexa emporcando a política ata extremos indicibles. Se hai que ir a Waterloo, vaise, porque convén non se sabe a quen, pero convén: o caso é navegar na inestabilidade ata que o barco no que se enrolou afunda. E desta vez o que semella estar a piques de naufragar é un PSOE que, por carecer, mesmo carece de salvavidas.
Junts non goberna: opta porque goberne outro e ofrece un apoio aparentemente válido ata que muda a situación. Apoia ao Goberno de Madrid, sabedor de que o día de todos os santos político chegará en algún momento. Será daquela o momento de petar na mesa e dicir claro e forte: “ata aquí chegamos”. E nunca se pregunta por que. O que importa é o caldo de cultivo que fixo na pota para, a partir dese instante, poñer trancas nas ventás e nas portas e que os queden dentro esmorezan cada pouco ata que o corpus se descompoña. Os anos de experiencia.
Non, Junts, non é un socio fiable na historia da política española: así se evidencia desde a restauración da democracia en España e a institucionalización do popular “ja soc aquí” de Josep Tarradellas.
Agora pon riba da mesa unha moción secundada pola propia Junts, PP, Vox, UPN e Coalición Canaria na que a organización catalanista -que non pon ascos a facer política en Madrid- xoga o papel fundamental de promotor dunha situación que, presumiblemente, vai levar a Pedro Sánchez a presentar a súa dimisión á fronte do Executivo cando non a convocar eleccións anticipadas na próxima primavera. Así Junts incide na inestabilidade do Executivo socialista malia a decisión deste de sacar adiante os Orzamentos do Estadio para 2027.
Será a baza a empregar por Núñez Feijoo para, finalmente, acceder á Moncloa?.
