A Asociación AMIPA (entidade inclusiva da comarca de Sar) desenvolverá este venres, 24 de xullo, unha nova xornada do proxecto Camiño á Inclusión, unha iniciativa que promove a participación activa das persoas con discapacidade intelectual no Camiño Portugués a Santiago. Entre as 9.00 e as 12.00 horas, no adro da Igrexa da Escravitude, un grupo de persoas usuarias da entidade ofrecerá acollida, orientación e información ás persoas peregrinas que percorren esta ruta xacobea. A actividade repetirase o 29 de xullo, no mesmo horario e lugar.
As persoas con discapacidade chegarán a esta cita tras completar un programa de formación específico sobre a historia do Camiño de Santiago, atención á persoa peregrina, comunicación sen barreiras, patrimonio rural galego, habilidades sociais e outros aspectos relacionados coa hospitalidade.
Durante a xornada tamén selarán credenciais, darán a coñecer recursos da contorna e compartirán coa veciñanza e cos visitantes a artesanía e os produtos de papelería elaborados nos obradoiros de AMIPA, inspirados no Camiño e na identidade da comarca do Sar.
Camiño á Inclusión aposta por un modelo no que as persoas con discapacidade intelectual deixan de ser unicamente destinatarias de programas sociais para asumir un papel activo como anfitrioas, compartindo coñecementos e hospitalidade con persoas chegadas de diferentes países. O proxecto busca favorecer o intercambio cultural, fortalecer os vínculos coa comunidade e contribuír a unha visión máis aberta e participativa da inclusión.
A iniciativa está impulsada por Alma Peregrina, en colaboración con AMIPA, que financia o proxecto, e conta co apoio da axencia especializada Galiwonders, que colabora con recursos económicos, materiais e persoal para labores de tradución, ademais da Parroquia da Escravitude e doutras entidades vinculadas ao Camiño de Santiago. O programa desenvolverase durante os meses de xullo, agosto e setembro e culminará cun Camiño Xacobeo Inclusivo ata a praza do Obradoiro, nun acto colectivo que porá o broche final a esta experiencia de participación comunitaria.
O proxecto nace tamén da vontade das propias persoas con discapacidade intelectual de AMIPA de participar activamente na comunidade, coñecer novas persoas e desenvolver iniciativas con sentido para elas, un propósito que guía esta iniciativa desde a súa orixe.
