O empresario e mecenas arousán Ramiro Carregal, fundador de FRINSA e afincado en Ribeira dende hai décadas, convocou unha nova edición do Premio Internacional de Investigación en Cardiología. Trátase da oitava edición deste galardón, dotado con 30.000 euros, e cuxo prazo para presentar candidaturas estará aberto até o 16 de outubro. Toda a información sobre os Premios de Investigación Ramiro Carregal está dispoñíbel na web premioramirocarregal.com, onde tamén se poden presentar directamente as candidaturas.
O empresario galego mantén o seu firme compromiso coa investigación e a sanidade ao convocar unha nova edición deste galardón, creado no ano 2018, que supuxo un paso máis na súa aposta polo mecenado no que xa contaba con destacadas accións, como un premio á investigación oncolóxica.
O presidente de FRINSA insiste en que é “un deber de toda a sociedade apoiar a investigación e a sanidade, posto que de ambas nos beneficiamos todos antes ou despois”.
O traballo que resulte gañador desta oitava edición sumarase aos sete anteriores que supuxeron un importante avance no ámbito da investigación das patoloxías e tratamentos destinados ás válvulas cardíacas. Na última edición premiouse o traballo liderado por Sonia Eiras Penas (Vila de Cruces, 1975), doutora en Bioloxía e líder do grupo de Cardioloxía Traslacional no Instituto de Investigación Sanitaria de Santiago de Compostela (IDIS). O seu proxecto “Medicina de precisión en pacientes con graxa epicárdica disfuncional asociada á enfermidade coronaria e ás valvulopatías máis frecuentes no noso medio! pretende identificar pacientes con patoloxía valvular asociada coa acumulación de tecido adiposo epicárdico disfuncional mediante biomarcadores e mostras de imaxe non invasivas que orienten sobre o risco a padecer estas enfermidades.
