O Consello da Xunta deu luz verde este luns ao teito de gasto non financeiro para o ano 2027, que se fixa nunha cifra récord de 15.022 millóns de euros. Isto supón un incremento de 782 millóns (un 5,5 % máis) respecto ao exercicio actual. Trátase da primeira vez que a Administración autonómica supera a barreira dos 15.000 millóns de euros, un fito acadado, segundo destacou o conselleiro de Facenda, Miguel Corgos, sen contar cos fondos extraordinarios europeos dos últimos anos.
O texto remitirase de xeito inmediato ao Parlamento galego para o seu debate e votación esta mesma semana ou a vindeira, un paso preceptivo na comunidade antes de presentar o proxecto de orzamentos no mes de outubro.
Previsións macroeconómicas prudente
Aproveitando a aprobación do límite do gasto, a Xunta actualizou o seu cadro macroeconómico para este ano 2026, elevando a estimación de crecemento do PIB galego do 1,9 % ao 2,1 %. Así mesmo, prevé pechar o ano cunha taxa de desemprego do 8,1 %. Para o ano 2027, o Executivo mantén un cálculo “prudente” de crecemento do 1,9 % e agarda que o paro baixe ao 7,7 %, rozando así mínimos históricos.
Corgos subliñou que 2027 será o sétimo ano consecutivo de expansión económica en Galicia, un período no que a comunidade creceu por riba da media estatal. Non obstante, o conselleiro xustificou a prudencia nas cifras polas “incertezas” externas —como os aranceis e as guerras que afectan o comercio internacional— e internas, entre as que citou a “inestabilidade” do Goberno central e a ausencia de novos Presupostos Xerais do Estado desde 2023.
Nesta liña, o titular de Facenda adiantou que Galicia reducirá por cuarto ano consecutivo o seu endebedamento neto, situando a rratio de débeda sobre o PIB no 12,7 %, un obxectivo que se acadará “tres anos antes” do previsto.
Rexeitamento á quita da débeda e reclamo de financiamento
Na rolda de prensa posterior ao Consello, na que tamén participou o presidente da Xunta, Alfonso Rueda, reiterouse o rexeitamento de Galicia á condonación da débeda proposta polo Goberno central, que na comunidade ascendería a 4.010 millóns de euros.
Rueda argumentou que Galicia “non ten un problema de débeda” e que a quita non se traduce en diñeiro real para gastar, senón que obrigaría a asumir a “mutualización” do endebedamento doutras comunidades autónomas. O titular do Executivo galego esixiu a negociación dun novo sistema de financiamento autonómico que sexa “xusto” e atenda ás necesidades reais da comunidade, criticando as negociacións bilaterais e sinalando que o modelo proposto deixa a Galicia con menos do 3 % do financiamento malia representar o 6 % da poboación estatal.
