O Salón Teatro de Santiago de Compostela, sede permanente do Centro Dramático Galego (CDG), prepárase para unha profunda intervención de conservación e mellora. A Xunta de Galicia acaba de adxudicar, a través do portal de Contratos de Galicia, a redacción do proxecto básico, de execución e a dirección de obra por un importe de 200.798,47 euros ao estudio de arquitectura pontevedrés Rodríguez+Pintos SLP, que disporá duns prazos de execución de ata 25,5 meses.
Esta actuación ten como obxectivo principal resolver os problemas de deterioración do edificio e adaptalo ás esixencias actuais de accesibilidade, seguridade e sostibilidade. O proxecto abranguerá a substitución completa da cuberta e a mellora dos sistemas de evacuación de auga para solucionar os problemas de estanquidade, a mellora das vías de evacuación e accesibilidade universal, e a sectorización antiincendios entre a caixa escénica e o resto do inmoble. Así mesmo, actualizaranse as instalacións de iluminación, climatización e auga quente para optimizar a súa eficiencia enerxética.
Un espazo centenario no corazón da capital galega
A actuación protexerá un dos escenarios con máis historia de Santiago de Compostela, cuxa orixe se remonta a 1919 coa reconstrución impulsada pola Liga da Mutua de Señoras de Santiago, sendo inaugurado en 1920. Ao longo do século XX, o inmoble situado no casco histórico pasou por diferentes mans: foi sede de Acción Católica e, nos anos trinta, transformouse nun emblemático cinema da man da Empresa Fraga.
A súa fachada actual, de trazo galeguista, débese á remodelación proxectada polo arquitecto Pons Sorolla en 1949. Tras sufrir un grave incendio nos anos noventa que precipitou o seu peche, a Xunta de Galicia adquiriu o edificio en 1996 para devolverlle a súa vocación teatral. Trala rehabilitación dirixida polos arquitectos Baltar, Bartolomé e Almuiña, o Salón Teatro reabriu as súas portas o 29 de outubro de 1999 coa obra Si o vello Sinbad volvese ás illas…, consolidándose desde entón como o epicentro da creación e exhibición do teatro público galego.
