O Concello de Boiro colabora coa Comisión de Festas de Exipto nunha nova edición da súa tradicional romaría. A concelleira de Cultura, María Outeiral, participou na presentación xunto con Vanesa Fernández e Cocó Blanco representantes da comisión.
As actividades comezan este venres 31 de xullo con actos litúrxicos, un espectáculo infantil de Raquel Queizás e a primeira edición do festival O Retumbar da Telleira que contará cos concertos de Malfinde, Belako, Mujeres e sesión de Rapariga DJ. “Este programa de actividades con espazo para todos os públicos é unha realidade grazas ao apoio da veciñanza e tamén das empresas colaboradoras”, recoñeceu Vanesa Fernández
O sábado 1 de agosto a actividade comezará coa alborada a cargo de O Ar de Loureda e Arume, haberá actos litúrxicos, animación infantil con festa da espuma, sesión vermú amenizada pola Orquestra Neverloura e sardiñada popular. Xa pola tarde torneo de birlos, batucada e, pola noite, verbena co Dúo Charada e Orquestra Platinum.
O domingo haberá actos litúrxicos e alborada con O Ar de Loureda e Arume; mercado ecolóxico A Eira dos Oficios coa asociación Alumiña; ás 12.00h misa e procesión coa actuación do grupo de baile de Abanqueiro e sesión vermú con Tremenda Sudada. Romaría amenizada por O Ar e Loureda e Home Orquestra con xogos populares.
A concelleira de Cultura, María Outeiral, animou á veciñanza a achegarse a Exipto e recoñeceu o gran traballo da comisión que “recuperou unha romaría tradicional e fai un gran esforzo para contar cada ano con propostas para os distintos públicos”.
