Continúan as actividades de lecer da Escola de Verán do Concello de Dodro. A semana pasada a rapazada participante saíu de excursión, descubrindo algúns dos espazos municipais do termo municipal. Ademais, tiveron ocasión de visitar a Casa da Cultura onde coñeceron de preto a biblioteca e a aula de informática e onde puideron achegarse aos recursos e servizos que están á disposición da veciñanza. Logo achegáronse ao Concello, onde foron recibidos por Ramón Abuín, tenente de alcalde, e Teresa Batalla, concelleira de Servizos Sociais e Igualdade. Alí, os nenos e nenas converteron a visita nun auténtico pleno municipal, formulando preguntas, facendo propostas e trasladando diferentes rogos aos representantes municipais.
“Foi unha experiencia moi enriquecedora para coñecer o funcionamento da Administración local e fomentar a participación desde as idades máis temperás”, informou o Concello, lembrando que a Escola é unha actividade enmarcada no Plan Corresponsables, está cofinanciada pola Consellería de Política Social e Igualdade da Xunta de Galicia, polo Ministerio de Igualdade e polo Concello de Dodro.
O programa deu comezo o pasado 22 de xuño e prolongarase ata o vindeiro 4 de setembro, co obxectivo de promover a conciliación da vida familiar, laboral e persoal, así como impulsar modelos de corresponsabilidade e igualitarios entre a veciñanza de Dodro.
Esta actividade, co-financiada polo Concello de Dodro, a Consellería de Política Social e Igualdade e o Ministerio de Igualdade do Goberno de España, ofrece unha ampla variedade de actividades das que están a gozar ao longo do verán máis de 60 nenos e nenas de entre 3 e 12 anos.
A Escola de Verán desenvólvese principalmente nas instalacións do CPI Eusebio Lorenzo Baleirón, converténdose nun espazo de lecer, aprendizaxe e convivencia para a infancia do municipio durante o período estival.
O programa de actividades inclúe tamén a realización de actividades festivas para as familias (como a celebración do 1 de xullo que incluíu cancións, bailes e un divertido mini partido de fútbol no que incluso algunha mamá animouse a participar) e de xornadas de traballo interxeracional coas persoas maiores de Dodro (con saídas ao Centro de Día para favorecer o lecer de pequenos e maiores e o intercambio de coñecemento).
A Escola de Verán de Dodro é totalmente gratuíta para as familias participantes, sendo Dodro o único concello da comarca que non cobra ningunha taxa por este servizo.
