O Concello de Rianxo recibiu ás catro axentes auxiliares de Policía Local (tres mulleres e un home) que serán incorporadas durante o presente verán. En concreto, foron recibidos polo alcalde Julián Bustelo, e polo tenente de alcalde Julio Alcalde.
Os catro axentes súmanse ao actual cadro da Policía Local de Rianxo co obxectivo de reforzar o servizo nos meses de verán, “uns meses de maior actividade, de intensa labor de vixilancia dos nosos monte e de maior número de dispositivos especiais con motivo de festexos e actividades lúdicas que se desenvolven en todas as parroquias”, sinalou o alcalde.
O proceso de incorporación realizouse de xeito unificado a través da Academia Galega de Seguridade Pública (AGASP) xunto con outros concellos.
Lembrar que estas incorporacións en Rianxo súmanse a un reforzamento da dotación local da Garda Civil que se vai materializar con dúas grandes novidades: cubríndose a praza de sarxento e incrementando o equipo de axentes con catro novos efectivos.
