O Goberno está a reorganizar a presenza da Garda Civil nos concellos do Barbanza. Farao incrementando as dotacións da Pobra do Caramiñal e Rianxo.
Na primeira das vilas habilitará un posto principal cunha ducia de efectivos, incluíndo un sarxento e un cabo. Este proceso de incremento de persoal enmárcase na transformación do Posto Auxiliar da vila en Posto Ordinario, unha iniciativa anunciada os días pasados polo subdelegado do Goberno, Julio Abalde. Esta disposición, que será efectiva a partir de xaneiro, permitirá incrementar de maneira progresiva a dotación de persoal até acadar os 12 gardas civís, fronte aos tres actuais, cun sarxento/sarxento 1º como comandante de posto; un cabo 1º/cabo como segundo comandante de posto e 10 gardas civís.
En Rianxo reforzará o destacamento con dúas importantes novidades: cubríndose a praza de sarxento e incrementando o equipo de axentes con catro novos efectivos. O alcalde Julián Bustelo acolleu a nova como “unha gran noticia que recibo con satisfacción e agradecemento; de feito vimos insistindo nestes últimos meses na necesidade de aumentar os efectivos do posto da Garda Civil de Rianxo”. Tanto na Pobra como en Rianxo aproveitarase a colaboración coa Policía Local para facilita “unha resposta máis áxil e efectiva as necesidades de seguridade cidadá que poidan xurdir”.
