A Escola de Música e Baile tradicional vai pechar o ano académico este mes de xullo con dúas actuacións, encadradas no seu Festival de Fin de Curso. A primeira das cita será este venres 10 de xullo, ás 20.00 horas, no adro da Igrexa de Santo Ourente. A segunda será a semana vindeira, o venres 17 de xullo, ás 20.30 horas en Valadares (na praza a carón da igrexa).
A Escola Municipal de Música e Baile Tradicional de Outes (EMBTO) é un centro público dependente do Concello de Outes dedicado á ensinanza e preservación do folclore galego. As súas actividades desenvólvense principalmente no antigo colexio do Cruceiro de Roo. Achega formación en instrumentos de vento (gaita, requinta, ocarina, frautín, frauta e asubío) e tamén noutros instrumentos como o acordeón e a zanfona, e tamén forma ao alumnado en percusión e en baile tradicional galego.
