Begoña Gómez, esposa de Pedro Sánchez, presidente do Goberno, deberá comparecer diante dun xurado popular por dous delitos: tráfico de influencias e malversación. Esta é a decisión da Audiencia Provincial de Madrid que referenda parcialmente deste xeito a do xuíz Peinado, que atribuía a Begoña Gómez catro delitos: os dous citados e os de corrupción nos negocios e apropiación indebida. A mesma Audiencia acordou devolver a Begoña Gómez o seu pasaporte, após a retirada do mesmo polo maxistrado, quen lle prohibira saír de España amais de obrigala a comparecer dúas veces cada mes ante o xulgado, medidas que a instancia superior asimesmo anulou.
O xuíz Peinado da por rematadas as pescudas sobre a dona do presidente do Goberno. As defensas coidan que o xuíz Peinado non motivou dabondo a súa decisión. Malia todo, semellan existir “indicios racionais de criminalidade” para seguir adiante contra Begoña Gómez polos dous delictos xa sinalados: tráfico de influencias e malversación, penados, respectivamente, con ata dous e catro anos de cadea.
O Goberno defende novamente a inocencia da muller de Pedro Sánchez baseándose en que se trata dunha denuncia falsa que parte de noticias asimesmo falsas cuxa única motivación é o acoso e a persecución da muller do presidente do Goberno. Esas mesmas fontes aluden a que esta “é unha causa política” iniciada após unha denuncia “falsa dunha organización ultradereitista para acosar e perseguir á muller do secretario xeral do PSOE e presidente do Goberno”.
