A décimo terceira edición da Inchadiña Branca Vela foi presentada este xoves 30 de xullo na sede da Fundación Rosalía de Castro. Trátase dunha romaría náutica e cultural na que participan aproximadamente 30 embarcacións tradicionais (principalmente dornas galegas con vela de relinga) que remontan o curso final do río Ulla. Está promovida pola Fundación Rosalía de Castro xunto coa Asociación Cultural Dorna da Illa de Arousa, en colaboración cos concellos bañados polo Ulla, como o de Rianxo, o de Dodro ou o de Padrón, cuxos alcaldes participaron na presentación da nova romaría, xunto co presidente da Fundación Rosalía Castro, Anxo Angueira, e a responsábel de Cultura da Deputación da Coruña, Natividade González.
A cita, indicaron, sairá este sábado 1 de agosto de Rianxo ás 11:00 horas.
Previamente e no marco desta celebración, este venres 31 de xullo presentarase no Pazo de Martelo (en Rianxo ás 20h) a revista galega de cultura marítima e fluvial Ardentía.
Volvendo á romaría náutica e como xa aconteceu nas dúas últimas edicións, partirá do porto de Rianxo. A expedición remontará o Ulla e o Sar ata chegar ao Espolón de Padrón, onde está prevista, arredor das 18:00 horas, a tradicional homenaxe a Rosalía diante da súa estatua
A Inchadiña Branca Vela celebrou a súa primeira edición en 2013, coincidindo co 150 aniversario da publicación de Cantares gallegos. A iniciativa xurdiu das asociacións vinculadas á cultura marítima para homenaxear a Rosalía de Castro, inspirándose nos versos nos que a autora evocaba as dornas remontando o río Ulla.
As embarcacións parten da ría de Arousa e remontan o río ata desembarcar no emblemático paseo do Espolón en Padrón, moi preto da Casa de Rosalía, onde se realiza unha ofrenda floral e unha lectura pública de poemas.
