O Festival Atlántica presentou en Santiago este luns 15 de xuño a súa décimo cuarta edición. A nova convocatoria, sinalaron dende a organización, vén cun programa máis extenso, novas sedes e unha maior presenza de artistas e proxectos vinculados ao patrimonio cultural e á tradición oral. Para Soledad Felloza, directora do evento, o aumento das cifras revela “que tras trece edicións, o Festival Atlántica revélase como un importante creador de públicos e novos escenarios para a narración oral galega aínda en crecemento”.
A programación amplía de xeito significativo a súa duración, con cinco días máis que na edición anterior, celebrándose do 26 de xuño ao 10 de xullo. Tamén reforza a súa presenza en todo o territorio: cun total de 33 localidades galegas, oito máis que o ano pasado. Do mesmo xeito, conta con 62 espazos escénicos e 50 artistas, con presenza de Galicia, Portugal, Navarra, Zamora, Huelva e Colombia, con continuidade do intercambio transfronteirizo e ibérico.
Asemade, continúa o Ciclo Novas Voces en varias sedes (Santiago, Mugardos, Ribeira, Pazos de Borbén, Outes, A Fonsagrada…) e amplíase o traballo en espazos patrimoniais, naturais e singulares en todo o territorio.
O festival conta co patrocinio xeral da Xunta de Galicia, da Deputación da Coruña, da Deputación de Lugo e mais co apoio dos diferentes concellos que participan, como é o caso do Concello de Santiago de Compostela onde se realizou a presentación.
No anuncio da programación participaron a concelleira de Capital Cultural, Turismo, Educación e Memoria Histórica do Concello de Santiago, Míriam Louzao; o director xeral de Cultura da Xunta de Galicia, Anxo M. Lorenzo; o alcalde do Concello de Dodro, Francisco X. Castro; a alcaldesa do Concello de Vimianzo, Mónica Rodríguez; alcalde do Concello de Pazos de Borbén, Luciano Otero; o alcalde do Concello de Outes, Francisco Calo; a concelleira de Cultura e Turismo de Teo, Mª Margarita Rosende; así como membros do equipo organizador encabezados pola directora do festival, Soledad Felloza.
A directora do Festival destacou que “Atlántica é hoxe un festival maduro, cunha identidade consolidada e cunha rede de colaboración que medrou co tempo. Moitas das voces que protagonizan a escena actual da narración en Galicia compartiron os seus primeiros pasos con nós e hoxe percorren o país formando parte dun tecido creativo cada vez máis sólido”.
Felloza fixo fincapé en que coincidindo co 50 aniversario do falecemento de Ramón Otero Pedrayo, a edición de 2026 incorpora propostas que dialogan co legado dunha das figuras fundamentais da cultura galega, reforzando a conexión entre tradición e contemporaneidade e reafirmando o compromiso do festival coa memoria cultural de Galicia.
Asemade, a lectura pública da obra de Begoña Caamaño, realizada coa colaboración de ASPANAES e aberta á participación da sociedade galega, exemplifica a dimensión comunitaria e inclusiva do festival.
Sobre o recoñecemento ás figuras fundamentais da cultura galega, destaca que a entrega da Cornamusa de Honra á profesora e investigadora Camiño Noia supón unha homenaxe a unha das grandes especialistas no estudo e difusión do conto popular e da tradición oral galega, salientando o rol da muller non só na trasmisión se non tamén na investigación.
A principal novidade desta edición é a súa expansión territorial e temporal. Durante quince días, Atlántica levará a narración oral a castelos, castros, petróglifos, mámoas, lavadoiros, eiras e airas, pozos do liño, escolas indianas, museos, bibliotecas, xardíns botánicos e sendas ecolóxicas, centros culturais, espazos naturais e lugares patrimoniais de toda Galicia.
O festival chegará a 33 localidades das catro provincias galegas, dende A Coruña, Santiago, Ferrol, Mugardos, Teo, Ribeira ou Vimianzo ata Ourense, Castroverde, Quiroga, Taboada, A Fonsagrada ou Xunqueira de Ambía, entre outras, consolidando unha rede cultural que conecta ámbitos urbanos e rurais a través da palabra contada.
Esta aposta polo territorio compleméntase cunha programación que continúa a explorar a relación entre patrimonio material e patrimonio inmaterial mediante roteiros narrados, conferencias, visitas guiadas, propostas vinculadas á memoria popular e espectáculos creados especificamente para espazos singulares.
En Outes
O domingo 28 de xuño Celso F. Sanmartín achegará o espectáculo Contar no Náutico do Freixo a partir das 20.30 horas. Para público adulto e de balde.
En Padrón
O xoves 2 de xullo Vero Rilo e Ángeles Goás representarán Contos colorados no Museo Camilo José Cela de Iria Flavia, Padrón. Será de balde e para público adulto. A partir das 21.00 horas.
En Dodro
O venres 3 de xullo representarase Donas do lugar na Eira da Malla de Bexo, Dodro, a partir das 21.00 horas e da man de María de Pontragha. A partir das 21h. De balde e para público adulto.
Na Pobra
O venres 3 de xullo Irene Reina (Huelva) levará á Pobra do Caramiñal, aos xardíns do Pazo do Couto, a obra en castelán Raianas. Será a partir das 21.00 horas. De balde e para público adulto.
En Padrón
O venres 3 de xullo o Museo Camilo José Cela acollerá a función Hamelin de Fran Rei, para a rapazada a partir de catro anos. De balde e a partir das 11h.
En Ribeira
Antonio Fontinha (Portugal) e Esmeralda Folgado (Zamora) levarán a Ribeira o espectáculo Inequivocamente. Será ás 21.00 horas. De balde e para público adulto.
En Dodro
O sábado 4 de xullo Irene Reina (Huelva) levará a Dodro, ao Pozo do Conxeiro ou do Liño, en Eiró (Dodro), a obra en castelán Historias raianas. Será a partir das 21.00 horas. De balde e para público adulto.
Na Pobra
O sábado 4 de xullo o Convento de Santo Antón da Pobra do Caramiñal acolle o espectáculo Contiñas, a partir das 21h. De balde e para público adulto.
En Ribeira
O Lavadoiro de Penisqueira (Aguiño, Couso) será o escenario da función O que non estaba escrito, o sábado 4 de xullo a partir das 21h, a cargo de Carmen Conde. De balde e para público adulto.
En Outes
O domingo 5 de xullo a artista navarra Amaia Elizagoien levará a Outes, ao Espazo Museístico da Carpintaría de Ribeira en Broña, a peza Contos do Norte, a partir das 21h. Para público adulto e de balde.
