Esta semana celebrouse en Muros a presentación de Soa Xuño, o programa de actividades da Escola Municipal de Música de Muros para o presente mes, na que participaron a alcaldesa de Muros, María Lago; a concelleira de Ensino, Laura Rivadeneira; o director da Escola Municipal de Música, César Acuña; e o profesor Fernando do Campo.
“O programa inclúe intercambios musicais, concertos de fin de curso e outras actividades que permitirán ao alumnado compartir co público o traballo realizado ao longo do curso”, explicou Maria Lago.
Laura Rivadeneira destacou o apoio do Concello de Muros á Escola Municipal de Música “e ao importante labor educativo que desenvolve ao longo de todo o ano”.
Pola súa banda, César Acuña sinalou que “a aprendizaxe musical vai moito máis alá da aula”, poñendo en valor os concertos e intercambios como unha parte fundamental da formación do alumnado.
Ao longo deste mes, a música será protagonista en diferentes espazos do concello, amosando o talento, o esforzo e a dedicación do alumnado da escola.
Intercambios
O sábado 6 de xuño levarase a cabo unha Xornada de Intercambio Musical, en Artón, Esteiro.
O sábado 13 de xuño levarase a cabo outra Xornada de Intercambio Musical na Pobra.
Concertos fin de curso
Este xoves 4 de xuño ás 19.00 celebrarase un concerto de piano, guitarra, canto e música tradicional na praza da Pescadería.
O xoves 11 ás 19.00 horas haberá un concerto de música moderna no Curro da Praza.
O venres 12 celebrarase un combo de adultos no local da Esteirana, ás 19.00 horas.
O martes 16 o local da Esteirana acollerá ás 19.00 horas un concerto de piano, guitarra, canto e batería.
O xoves 18 de xuño o Auditorio de Muros será o escenario (ás 19.00 horas) dun concerto do Cuarteto Biselas.
