O Centro de Interpretación do Castro de Baroña acolleu este mércores a presentación da andaina “Porto do Son 25 + 15 km”, unha proba organizada polo Club Trabandainas que se celebrará o vindeiro 7 de xuño.
A iniciativa forma parte da Liga Galega de Andainas 2026 e está incluída no calendario oficial da Federación Galega de Montañismo e da Liga Ibérica de Senderismo. O evento conta coa colaboración do Concello de Porto do Son.
As persoas interesadas poden inscribirse ata o 4 de xuño ás 23:59 horas a través da plataforma Deporticket. A proba contará con dous percorridos circulares, de 25 e 15 quilómetros, ambos de dificultade media, con saídas previstas ás 9:00 e 9:05 horas respectivamente.
A saída e chegada situaranse na Casa A Tarela, onde tamén se realizará a entrega de dorsais entre as 8:00 e as 8:45 horas. Ademais, a organización dispuxo tres puntos de avituallamento ao longo do percorrido e ofrecerá petiscos ao remate da andaina.
Na presentación participou a tenente de alcalde, María Maroñas, quen destacou o compromiso do Concello co fomento do deporte. Neste sentido, animou á veciñanza a participar nunha proba “emblemática e popular” e a desfrutar da riqueza paisaxística do municipio.
Maroñas subliñou tamén o valor desta actividade como exemplo de deporte inclusivo, lembrando que “calquera persoa, independentemente da súa condición física, pode facer deporte”.
