A XXV Regata Frinsa reuniu este sábado na ría de Arousa a 40 embarcacións da clase ORC nunha edición moi especial, marcada pola homenaxe ao empresario Ramiro Carregal Rey pola súa traxectoria e compromiso co deporte da vela e co mar.
Organizada polo Club Náutico e Deportivo de Ribeira, a competición desenvolveuse nunha xornada de excelentes condicións meteorolóxicas, con mar e vento favorables que permitiron completar con rapidez o percorrido deseñado polo comité de regatas entre boias e faros da ría.
A saída produciuse arredor das 13.00 horas e pouco despois das 15.30 todas as embarcacións xa regresaran aos pantaláns do club anfitrión, onde tivo lugar a entrega de premios e unha degustación de produtos da conserveira Frinsa. En representación de Ramiro Carregal asistiu a súa filla, Lourdes Carregal, debido á indisposición do empresario.
Na categoría Regata, o triunfo foi para o Peperetes-Nortemar, patroneado por José Manuel Millán e pertencente ao Real Club de Regatas de Galicia de Vilagarcía. O segundo posto foi para o Bon III, de Víctor Carrión, do Club Náutico Punta Lagoa, mentres que o Galopín, de Manuel Franco, do Club Náutico e Deportivo de Ribeira, completou o podio.
Na clase Cruceiro-Regata, o Orión, de Alberto Javier Pérez, do Monte Real Club de Yates de Baiona, revalidou o título conseguido nas edicións de 2024 e 2025. O Maracaná, de Carlos García, do Real Club de Mar de Aguete, foi segundo, e o Camping Ría de Arosa, de José Manuel Pombar, do Club Náutico Arousa Norte, ocupou a terceira posición.
Pola súa banda, na categoría Cruceiro, o vencedor foi o Fixius, de Miguel Pérez Lafuente, do Real Club de Regatas de Galicia de Vilagarcía. O Piko Norte, de José Manuel Castro, do Club Náutico de Boiro, acadou a segunda praza, mentres que o Bacor, de Francisco Villaamil, do Real Club Náutico de Portosín, pechou o podio.
A entrega de premios contou cunha ampla asistencia de público e coa presenza da alcaldesa de Ribeira, Mariola Sampedro; Lourdes Carregal; o presidente do Club Náutico e Deportivo de Ribeira, José Luís Torres Colomer; a presidenta de Cruz Vermella Ribeira, Ángeles Mera; o presidente da Real Federación Galega de Vela, Manuel Villaverde, ademais doutras autoridades e representantes do ámbito náutico.
