O Pazo de Goiáns acolle durante o mes de xuño unha exposición do deseñador boirense, Juan Ares. A inauguración da mostra tivo lugar no histórico inmóbel boirense este luns 8 de xuño con motivo do Dia Mundial dos Océanos e contou coa asistencia do alcalde, José Ramón Romero, e a concelleira de Cultura, María Outeiral.
Trátase dunha colección de mobles feitos con rede de pesca mariñeira, un traballo feito polo deseñador durante 10 anos. Na mostra poden verse deseños de distintas coleccións realizadas ao longo dos anos, pero todas elas inspiradas no medio mariño.
Xunto coa inauguración da mostra, e para conmemorar o Día Mundial dos Océanos, celebrouse un coloquio realizado polo deseñador sobre o respecto ao medio mariño e as oportunidades que xorden do mesmo no eido do deseño.
A mostra poderá visitarse durante o mes de xuño no Pazo de Goiáns en horario de mércores a sábado de 11.30 a 13.30 horas e de 18.00 a 21.00 horas; os martes de 18.00 a 21.00 horas e os domingos de 11.30 a 13.30 horas.
Juan Ares (Escarabote, Boiro, 1978) é un destacado deseñador e interiorista galego. É coñecido internacionalmente polo seu concepto Marine Design, no que emprega materiais e residuos do mar (como redes de pesca abandonadas) para elaborar pezas de mobiliario e decoración.
Algúns dos seus fitos e proxectos máis destacados inclúen o deseño interior do mercado gastronómico La Galiciana situado en Santiago de Compostela e traballos e charlas sobre o deseño e o respecto ao medio mariño en espazos culturais de referencia. É graduado Superior na Escola de Arte e Superior de Deseño (EASD) Mestre Mateo de Santiago de Compostela. A súa obra busca poñer en valor a sustentabilidade e a alma mariña das nosas rías.
