O Concilia Verán do Concello de Noia acadou este ano un récord de solicitudes, confirmando, segundo o Goberno local, “a crecente demanda dos servizos municipais de conciliación”. Así, apuntan, malia “o esforzo realizado polo Concello para ampliar tanto o número de prazas como os horarios do programa”, as quendas de maior capacidade, preparadas para acoller ata 160 nenos e nenas, superaron as 220 solicitudes, “unha resposta que evidencia a necesidade deste recurso entre as familias noiesas”, engaden.
Para a concelleira de Educación, Ana Blanco, estes datos constitúen a mellor avaliación posíbel do traballo realizado nos últimos meses. “Quixemos facer un esforzo importante para ampliar a capacidade do servizo porque sabiamos que existía unha demanda crecente. Hoxe comprobamos que ese esforzo pagou a pena e que as familias valoran que o Concello aposte por ofrecer solucións reais para a conciliación”, afirmou.
Blanco incidiu en que o obxectivo do Goberno municipal vai máis alá de organizar unha actividade estival. “Estamos a traballar para seguir mellorando os servizos municipais de conciliación, escoitando ás familias e adaptando os recursos ás súas necesidades. Queremos que a conciliación deixe de ser un problema e se converta nun apoio efectivo para o día a día de centos de fogares”, sinalou.
A concelleira tamén quixo agradecer expresamente a colaboración do IES Campo de San Alberto, que permitirá desenvolver un ano máis o programa nas súas instalacións. “Estamos enormemente agradecidos pola súa disposición. Contar cun espazo céntrico como o IES Campo de San Alberto é unha gran vantaxe, porque facilita que moitas familias poidan desprazarse andando e organizar mellor as súas rutinas diarias. É un lugar idóneo para un servizo destas características, como demostra tamén o extraordinario número de solicitudes”, destacou.
Desde o Concello lembran, ademais, que este é o primeiro Concilia Verán que se desenvolve tras a entrada en vigor da ordenanza Noia Concilia, unha ferramenta creada para garantir a continuidade das políticas municipais de conciliación ao longo de todo o ano. “Con esta ordenanza quixemos blindar e asegurar a conciliación como un compromiso permanente do Concello. Os horarios que establecemos responden ao que as familias nos demandaban e permiten unha conciliación real a moitas persoas que ata agora non atopaban unha alternativa compatible coa súa vida laboral”, concluíu Ana Blanco.
O Goberno municipal considera que “a elevada participación reforza a necesidade de seguir investindo neste tipo de políticas públicas, consolidando un modelo de conciliación estable, accesible e adaptado á realidade das familias de Noia”.
