O Concello de Ribeira está a traballar na elaboración da I Guía de recursos de atención á infancia e adolescencia, unha iniciativa que se enmarca no traballo da Mesa Local da Infancia e Adolescencia (MIA), coordinada pola Concellería de Servizos Sociais.
Segundo informan desde o consistorio, este novo recurso terá carácter gratuíto e estará dispoñible en formato dixital, co obxectivo de facilitar á cidadanía o acceso á información sobre os servizos e programas dirixidos á infancia e mocidade no municipio.
Para a súa elaboración, vén de iniciarse unha campaña de recollida de información. Nesta primeira fase, as representantes das distintas comisións da MIA enviarán convites ás entidades que traballan con nenos, nenas e adolescentes en Ribeira, co fin de recompilar datos sobre os seus recursos e actividades.
As entidades interesadas en formar parte desta guía poden participar cubrindo un formulario en liña antes do vindeiro 5 de xullo a través da ligazón https://forms.gle/DNHKMwGrap2pE9Dg9.
Desde o Concello sinalan que, no caso de que algunha entidade non reciba o convite electrónico, poderá igualmente sumarse á iniciativa accedendo directamente ao formulario habilitado.
