O deputado do BNG no Congreso, Néstor Rego, reclamou ao Goberno do Estado “desbloquear o expediente iniciado para o recoñecemento dos coeficientes redutores que permitan a xubilación anticipada do persoal do Servizo de Gardacostas da Galiza”. En concretou, demandou “unha actuación inmediata do Ministerio de Inclusión, Seguranza Social e Migracións para dar curso á solicitude presentada ao abeiro do Real Decreto 1698/2011 e rematar cunha situación de discriminación que afecta a este colectivo”.
Segundo sinala Rego, “o persoal de Gardacostas da Galiza desenvolve o seu traballo no mar, sometido ás mesmas condicións de risco, desgaste físico e penosidade que outros profesionais que xa teñen recoñecidos coeficientes redutores para acceder á xubilación anticipada”. Por iso, considera “inxustificábel” que continúe excluído deste dereito unicamente pola súa condición funcionarial.
O deputado nacionalista lembrou que “esta é unha reivindicación histórica do colectivo e que tanto a representación sindical como o propio BNG trasladaron en numerosas ocasións esta demanda ás institucións do Estado”. E engadiu: “Non existe ningún impedimento para resolver esta cuestión e a solicitude xa foi realizada, o que falta é vontade política para tramitar e resolver o expediente”.
A formación nacionalista denuncia que “a pesar de que o procedemento foi iniciado en abril de 2024 pola Confederación Intersindical Galega, organización sindical máis representativa na Galiza, desde entón non se coñece ningún avance efectivo e non se produciron comunicacións oficiais sobre o estado da tramitación nin actuacións orientadas á súa resolución por parte da Dirección Xeral de Ordenación da Seguranza Social”.
Para Néstor Rego, “o Goberno do Estado non pode seguir mantendo paralizada unha demanda plenamente xustificada e avalada polas condicións reais nas que desenvolven o seu labor os e as gardacostas galegas”. Neste sentido, subliñou que este persoal debe cumprir os mesmos requisitos de formación, aptitude médica e habilitación profesional que o resto de traballadores e traballadoras do mar, realizando ademais funcións de inspección, control e salvamento en condicións especialmente esixentes.
“O Ministerio de Seguranza Social debe actuar dunha vez por todas para corrixir esta discriminación e garantir un trato xusto ao persoal de Gardacostas da Galiza. Non son admisíbeis máis atrasos nin máis escusas”, concluíu Rego.
