A praza Macías de Padrón acolleu este mércores 10 de xuño pola mañá a entrega dos premios correspondentes á campaña Merca no teu Comercio, que se desenvolveu entre o 15 e o 30 de maio nos municipios de Padrón, Rois e Dodro, cun total de 1.022 tíckets rexistrados.
Entre os consumidores que mercaron nos establecementos destas localidades durante a iniciativa, sorteáronse 1.000 euros, repartidos en 20 tarxetas prepago de 50 euros. Os gañadores recibiron esta mañá o seu premio, que deberán empregar en novas compras no comercio de proximidade local.
Merca no teu Comercio ten Premio é unha campaña de promoción e dinamización das vendas do comercio de proximidade dos municipios rurais organizada pola Federación de Comercio de A Coruña, a Federación Galega de Comercio e a Xunta de Galicia.
Na entrega dos galardóns participaron representantes das entidades organizadoras, entre eles José Antonio Seijas Castro, presidente da Federación de Comercio de A Coruña; Anxo Rei Arca, alcalde de Padrón; Luis Fernández Díaz, secretario xeral da Federación Galega de Comercio; así como representantes de Abanca.
