O Concello de Boiro está a levar a cabo as obras para a conversión a céspede artificial do Campo de Fútbol da Mina, en Lampón. O alcalde, José Ramón Romero; o concelleiro de Urbanismo e Obras, Luís Ruiz; e o concelleiro de Deportes, Marcos Fajardo; visitaron as instalacións para coñecer o estado de execución das obras.
Logo da nivelación do terreo de xogo e a aplicación do pavimento continuo a base de aglomerado asfáltico, esta semana comezouse a instalación do tapiz de céspede artificial. “Este campo sumase agora ás demais instalacións deportivas municipais, podendo aumentar a actividade deportiva que se desenvolve na instalación”, recoñeceu o alcalde.
As actuacións que se están a levar a cabo na instalación deportiva buscan converter o terreo de xogo, formado de árido e con desniveis importantes, a un campo de fútbol de céspede artificial dunhas dimensións exteriores de 100×56 metros. Ademais do propio terreo de xogo vanse instalar parabalóns e as varandas laterais, así como a mellora dos accesos ao terreo de xogo.
As obras que se están a executar ascenden aos 673.325,59 euros e están financiadas mediante o Plan de Obras e Servizos (POS+ Concellos) da Deputación da Coruña.
