O conselleiro de Sanidade, Antonio Gómez Caamaño, destacou a posta en marcha do Rexistro Galego de Persoas Centenarias (Regace), unha iniciativa pioneira en España que situará Galicia como referente no estudo da lonxevidade e permitirá afondar nas claves do envellecemento.
Segundo explicou, na actualidade preto de 1.800 persoas de cen ou máis anos residen na comunidade, o que representa arredor do 12% do total da poboación centenaria do Estado. Un dato que, ao seu xuízo, evidencia tanto a realidade demográfica galega como unha oportunidade para avanzar no coñecemento científico e sanitario.
O titular de Sanidade puxo tamén en valor os indicadores de esperanza de vida en Galicia, que se sitúan en 81,19 anos para os homes e 86,83 para as mulleres, por riba da media estatal en ambos os casos.
Na presentación do rexistro, na que estivo acompañado pola directora xeral de Planificación e Reforma Sanitaria, Sofía López, e pola directora xeral de Saúde Pública, Carmen Durán, Gómez Caamaño subliñou que o Regace non será só unha ferramenta estatística, senón tamén un instrumento clave para orientar as políticas sanitarias.
Neste sentido, explicou que o rexistro se aliña coa Estratexia galega de saúde 2030, que aposta por un modelo asistencial máis preventivo, personalizado e baseado no coñecemento. Así, permitirá recompilar información epidemiolóxica máis precisa sobre as persoas centenarias, identificar factores asociados ao envellecemento saudable e mellorar a planificación dos servizos sanitarios e sociosanitarios.
Ademais, facilitará aos profesionais sanitarios unha maior dispoñibilidade de datos para ofrecer unha atención adaptada ás características e necesidades deste colectivo. O conselleiro avanzou tamén que a Xunta publicará proximamente a orde que regulará o funcionamento do Rexistro Galego de Persoas Centenarias.
