A Unidade Central Operativa (UCO) da Garda Civil considera “incompatible” o enriquecemento persoal da muller do presidente do Goberno, Pedro Sánchez, pola baixa facturación que esta realizaba. O informe das conclusións da UCO sobre as investigacións da Garda Civil xa foi entregado ao xuíz Juan Carlos Peinado. O contido deste informe semella non ser do agrado do maxistrado, que leva máis de dous anos cunha instrución baseada nunha denuncia realizada polo sindicato Manos Limpias con recortes de prensa e a opinión pública conservadora.
Como se sinalaba anteriormente, a Garda Civil considera “incompatible” a existencia dun enriquecemento persoal co feito de que en dous anos tan só se facturaran 17.000 euros á Universidade Complutense de Madrid, o que desmonta o groso das teses de Peinado.
Salienta amais o informe que as empresas privadas que financiaron a creación do software de sostibilidade de pemes eran totalmente conscientes de que o diñeiro que aboaban ía dirixido ás contas da universidade e non ás da muller do xefe do Goberno. Sobre a participación da súa asesora, Cristina Álvarez, a UCO entende que colaborou coas actividades académicas de Begoña Gómez, aínda que certifican que os 200 correos que puido enviar non teñen ningún interese para a investigación, o que desmonta á súa vez outra das teses do xuíz Peinado.
O informe, de máis de 300 páxinas, da a razón á defensa da muller de Pedro Sánchez e bota por terra a longa instrución do xuíz que se vai acoller á xubilación a finais do vindeiro mes de setembro.
Debido á escasa complicación investigativa dos feitos, sorprende que se tardara moito máis tempo en chegar ás conclusións que noutros casos, agás que se prolongara artificialmente para prexudicar conscientemente ao matrimonio Sánchez-Gómez.
Conclúen no PSOE que “non hai irregularidade na xestión da cátedra, non hai enriquecemento ilícito, non hai movementos sospeitosos nas súas contas.. O que hai é unha persoa honesta á que lle queren destruir a súa v¡da e atacar ao Goberno. Dous anos de persecución e acoso que deben rematar canto antes”.
