A xornada do xoves estará marcada pola inestabilidade atmosférica, debido á presenza de aire frío en capas altas da atmosfera.
En Rías Baixas, agárdanse ceos máis abertos en xeral, con néboas matinais puntuais a primeiras horas. Co avance do día poderán aparecer nubes de evolución, aínda que con menor probabilidade de precipitacións ca no interior.
En Santiago de Compostela, a situación será algo máis inestable. Tras un comezo con posibles néboas, medrarán as nubes ao longo da xornada, deixando chuvascos localmente treboentos, especialmente pola tarde, cando poderán ser máis intensos.
As temperaturas mínimas manteranse sen cambios significativos, mentres que as máximas experimentarán un lixeiro ascenso. En canto ao vento, soprará do nordés moderado na metade norte, sendo frouxo no resto, con tendencia a virar a suroeste ao final do día.
O noso mar; vento do norte á mañá, do noroeste á tarde e variable á noite, forza 1 a 3 á mañá e 2 a 3 á tarde e á noite. Mar ovellado. Visibilidade boa. Mar de fondo do noroeste, con ondas de 0.5 a 1 metros.
