O suceso ocorreu na Rúa dos Irmáns Labarta. Foi un dos habitantes da vivenda quen realizou a chamada ao 112 Galicia ás 13:25 horas para informar de que estaba a arder a cociña da casa. Minutos despois, o propio alertante indicou que xa sufocaran as lapas, pero que o seu marido precisaba asistencia sanitaria ao presentar queimaduras na cara.
De inmediato, dende o Centro Integrado de Atención ás Emerxencias (CIAE) 112 Galicia solicitouse a intervención do GES de Noia, dos Bombeiros de Boiro, do Servizo de Urxencias Sanitarias de Galicia-061 e dos axentes da Policía Local.
Unha vez no lugar, os medios de emerxencia confirmaron que o incendio xa estaba extinguido, polo que procederon a ventilar a vivenda e a realizar as medicións de gases correspondentes. Segundo as informacións recollidas, arderon varios mobles e electrodomésticos da cociña, e o resto do piso quedou afectado polo fume. A maiores, os servizos médicos evacuaron á persoa ferida ao centro hospitalario de referencia.
