A Asociación Solidariedade Galega co Pobo Saharaui (SOGAPS) busca familias de acollida de menores saharauís en Rianxo, para pasar o verán na localidade e lonxe das temperaturas extremas do deserto africano, dentro do programa Vacacións en Paz 2026, no que colabora dende hai anos, activamente, o Concello de Rianxo. Dende o Goberno local lembran que “cada verán, nenos e nenas saharauís que viven nos campamentos de persoas refuxiadas no deserto teñen a oportunidade de pasar dous meses (xullo e agosto) lonxe de condicións extremas; son menores que medran soportando temperaturas superiores aos 45º, con recursos moi limitados e afastados de moitas das oportunidades básicas que aquí damos por feitas”.
Por iso, a Asociación Solidariedade Galega co Pobo Saharauí fai un chamamento a toda Galicia para abrir as portas dos seus fogares e dos seus corazóns. “Precísanse familias de acollida que queiran ofrecerlles un verán diferente: de descanso, atención médica, alimentación equilibrada e, sobre todo, agarimo”, sinalan dende SOGAPS e o Concello, lembrando que para máis información está dispoñíbel a conta asociacion sogaps@yahoo.es e o teléfono móbil 669 078 725.
