A Cruz Vermella de Boiro impartirá en Rianxo unha charla informativa sobre o procedemento de regularización extraordinaria para persoas estranxeiras en situación irregular. Abordaranse polo miúdo os pasos a seguir (tramitacións, solicitudes) para acadar a regularización.
Será o vindeiro martes 5 de maio no Auditorio de Rianxo, a partir das 10.00 horas. Contarase coa colaboración do Concello.
A Regularización Extraordinaria de Inmigrantes 2026 é un proceso excepcional aprobado polo Goberno de España, mediante Real Decreto, que permite a estranxeiros en situación administrativa irregular obter permiso de residencia e traballo se estaban no país antes do 1 de xaneiro de 2026. Este mecanismo busca ofrecer seguridade xurídica a unhas 500.000 persoas e intégrase no Plan de Integración e Convivencia Intercultural.
Esíxese principalmente o seguinte: estar en España antes do 1 de xaneiro de 2026, acreditar unha permanencia ininterrompida de polo menos 5 meses, non ter antecedentes penais en España nin en países anteriores, e presentar pasaporte caducado ou en vigor. Débese demostrar a estancia mediante empadroamento, informes médicos, ou contratos.
