Portos de Galicia e o Concello de Ribeira acordaron a proposta para a reversión ao Estado de terreos considerados innecesarios para a actividade portuaria, co obxectivo de que poidan ser posteriormente transferidos á administración local para uso público.
O acordo foi pechado nunha reunión entre o presidente do ente público, José Antonio Álvarez, e a alcaldesa de Ribeira, María Sampedro, na que se definiu a delimitación do solo afectado seguindo criterios técnicos consensuados coa Fegamp.
No caso do porto de Ribeira, os terreos situados actualmente en dominio público portuario que a Xunta de Galicia proporá devolver ao Estado para a súa posterior transferencia ao Concello correspóndense coas beirarrúas de todo o paseo das Carolinas e o Malecón e a parte de titularidade portuaria dos edificios do antigo auditorio e o mercado municipal
Este encontro enmárcase na terceira fase do proceso que Portos de Galicia está a desenvolver para trasladar á Administración Xeral do Estado as solicitudes de reversión formuladas polos concellos. Ata o momento, xa se remitiron propostas correspondentes a 17 dos 25 municipios solicitantes.
Durante a reunión, ambas administracións tamén abordaron medidas para reforzar a seguridade no porto de Ribeira, coincidindo na necesidade de impulsar accións conxuntas que permitan reducir incidentes en zonas portuarias.
