O Grupo Municipal Socialista de Ribeira vén de compartir a súa valoración sobre o pleno da Corporación celebrado este luns 25 de maio. Nun comunicado denuncian que a sesión “volveu evidenciar a perda de control do Goberno local sobre a xestión municipal”.
Segundo o PSdeG, o Executivo “converteu a sesión nunha sucesión de correccións de expedientes mal tramitados, explicacións contraditorias e xustificacións sen consistencia”.
Os socialistas sinalou como exemplo a subsanación das obras do POS+2026, que ten, dixo, “expedientes que chegaron ao pleno sen incorporar correctamente as modificacións solicitadas e mantendo referencias a unha norma derrogada hai xa catro anos”. Para o voceiro socialista, Fran Suaŕez-Puerta, “non é aceptábel escudarse en que os técnicos teñen moitos proxectos atrasados. O que procede é presentar os proxectos ben, adaptados á legalidade e respectando os convenios dos traballadores”, indicou o portavoz socialista, criticando tamén “a falta de rigor da inmatriculación do parque de San Roque”, na que votaron a favor pero reiterando “a súa oposición a que se utilice o parque periurbano para construír alí a residencia de maiores”. Neste punto sinalaron que “queremos unha residencia para Ribeira, pero non nunha zona costa arriba, no medio do monte, afastada do centro e illando as persoas usuarias. Esa parcela non é a adecuada para facer unha residencia”, afirmou Suárez-Puerta.
O PSdeG tamén censurou “a actitude da alcaldesa durante o debate”, á que acusaron de “tentar xustificar a súa posición con referencias legais inexistentes e argumentos que”, segundo os socialistas, “non se corresponden coa realidade”.
“Cando se lle di que está mentindo á veciñanza, pretende expulsarnos do pleno por non asentir e calar”, denunciou o portavoz socialista.
No mesmo pleno, o PSdeG apoiou o recoñecemento a Quico Domínguez, proposto pola veciñanza, para que un espazo leve o seu nome diante da que foi a súa casa no Pombal.
Fronte a proposta do PP que presentou unha emenda sobre aparcadoiros disuasorios sen localización, sen calendario e sen proxecto, os socialistas defenderon “unha política turística seria e a necesidade de crear aparcamentos para residentes”. E engadiron: “Queremos turismo, pero con control e priorizando a quen vive aquí, para poder prepararnos mellor para recibir as persoas que nos visitan”.
Os socialistas dixeron tamén que “existe unha descoordinación entre PP e PBBI” e que “o carril bici de Palmeira volveu a deixar en evidencia as tensión internas do goberno”. Apuntaron que “o PBBI di que o proxecto se pode modificar e o PP que non; a alcaldesa comeza negando problemas de velocidade na estrada e acaba recoñecendo que hai vehículos que circulan a máis de 70 km/h; e o Goberno di á veciñanza que gañará espazo mentres pretende encaixar máis usos nos mesmos metros”.
“Din que falan coa veciñanza, pero o certo é que o proxecto xa estaba aprobado e adxudicado cando se reuniron cos veciños. Non pretendían modificar nada, só facer propaganda”, concluíu Suárez-Puerta.
Por último, o PSdeG apoiou a moción conxunta da oposición, impulsada coa Comisión pola Recuperación da Memoria Histórica do Barbanza, para defender o monumento da memoria democrática. “Aquí houbo Guerra Civil, houbo persoas represaliadas e Ribeira non pode permitir que se ataque a súa memoria”, concluíron os socialistas.
