O Concello de Boiro colabora coa Fundación Alcalde Varela e a Asociación Cultural Barbantia no desenvolvemento do XX Agasallo a Luís Seoane, que será o vindeiro luns 1 de xuño no Pazo. A concelleira de Cultura, María Outeiral, participou na presentación xunto con Bárbara da Silva e María Eugenia Alcalde, membros da Fundación.
O XX Agasallo a Luis Seoane celebrarase este luns ás 19.00 horas no Pazo de Goiáns, coincidindo coa data de nacemento do artista e intelectual galego (Buenos Aires, 1910 – A Coruña, 1979). Forma parte dunha iniciativa promovida dende o 2007 por Rosa Espiñeira Pan, conservadora, documentalista e investigadora a súa obra plástica e literaria.
Esta edición estará vinculada a unha homenaxe a Manuel Lourenzo, dramaturgo e actor fundamental da cultura galega contemporánea. O programa incluirá un recital de catro poemas a Luís Seoane, seleccionados polo propio Manuel Lourenzo, que será interpretado pola actor Xosé Manuel Esperante.
Como parte simbólica da celebración, realizarase unha plantación de tres plantas de ruda e un allo verde, en lembranza do libro de lendas de Luis Seoane Tres hojas de ruda y un ajo verde.
Fundación Alcalde Varela
A Fundación Alcalde Varela nace coa vontade de preservar a memoria artística custodiada no Pazo de Fonteneixe e dar continuidade ao legado cultural e humano de Salvador Alcalde e Loly Varela, que ao longo das súas vidas apoiaron e acompañaron a destacados artistas galegos como Luís Seoane, Laxeiro ou Colmeiro. Dende Boiro e a comarca do Barbanza, a fundación impulsa iniciativas culturais orientadas á promoción do patrimonio artístico, á creación contemporánea e ao fortalecemento da identidade cultural galega.
