O novelista, poeta e articulista ourensán Alfredo Conde será distinguido este luns co XI Premio José Luís Alvite, un galardón de columnismo de opinión que concede a Asociación de Periodistas de Galicia (APG) en recoñecemento á súa “dilatada traxectoria no mundo literario e xornalístico”.
O acto de entrega terá lugar no centro social polivalente de Brión, concello no que reside o autor, a partir das 19:30 horas. A laudatio correrá a cargo do filólogo e crítico literario Armando Requeixo Cuba, mentres que Conde recibirá a escultura conmemorativa do premio, “A Deusa de Alvite”, obra de Acisclo Manzano.
Na cerimonia participarán o conselleiro de Cultura, Lingua e Xuventude, José López Campos; a presidenta da APG, María Méndez González; e o alcalde de Brión, Pablo Lago Sanmartín.
O xurado, integrado pola Xunta Directiva da APG, destaca a traxectoria de Conde ao longo de case seis décadas, que lle valeu recoñecementos dentro e fóra de Galicia. Entre eles figuran premios como o Nadal, o Nacional de Literatura, o Nacional da Crítica ou o Ginzane-Cavour á mellor novela estranxeira editada en Italia en 1990.
No ámbito xornalístico, as súas colaboracións en prensa foron distinguidas con galardóns como o Julio Camba, Fernández Latorre, Cunqueiro e Puro Cora. Ademais, recibiu a Medalla Castelao en 2016, foi nomeado doutor honoris causa pola Universidade de Melbourne, cabaleiro da Orde das Artes e das Letras de Francia e fillo predilecto da provincia de Ourense.
O xurado salienta tamén a súa capacidade como narrador, tanto na literatura como no xornalismo, cunha obra que retrata con precisión persoas, feitos e épocas, deixando pegada das súas propias vivencias.
Alfredo Conde (Allariz, 1945) desenvolveu unha ampla traxectoria profesional que abrangue ámbitos como o ensino, a política e a xestión cultural. Foi mariño mercante e profesor de Historia, deputado no Parlamento de Galicia entre 1981 e 1993 e conselleiro de Cultura entre 1987 e 1990.
No eido literario, foi primeiro vicepresidente da Asociación de Escritores en Lingua Galega e primeiro presidente do PEN Club de Galicia. A súa obra foi traducida a múltiples idiomas, entre eles inglés, italiano, chinés, portugués, francés e ruso.
