O Concello de Rois pon en marcha unha nova edición de Móvete no Verán, o programa municipal de actividades deportivas estivais que incluirá sesións de zumba e pilates durante os meses de xullo e agosto.
A iniciativa, dirixida a persoas adultas, busca fomentar hábitos de vida saudábeis e promover a práctica de exercicio físico mediante actividades dinámicas e adaptadas a diferentes niveis.
As clases comezarán o próximo 1 de xullo e celebraranse tanto en Rois como en Urdilde, sempre ás 20.30 horas.
Dentro da programación, o pilates desenvolverase os martes en Urdilde e os mércores en Rois, mentres que a zumba terá lugar os luns en Rois e os xoves en Urdilde.
O prazo de inscrición abrirase o 15 de xuño. As persoas interesadas poderán anotarse chamando ao Multiúsos de Rois no teléfono 981 816 061 ou enviando un correo electrónico a inscricions@rois.gal, indicando nome e apelidos, data de nacemento, enderezo e teléfono de contacto.
O prezo da actividade será de 35 euros por participar nunha das disciplinas durante todo o verán e de 50 euros no caso de inscribirse nas dúas actividades.
Móvete no verán pretende ofrecer á veciñanza unha alternativa saudábel e dinámica para os meses estivais, promovendo a actividade física e o benestar a través de propostas accesíbeis e adaptadas a diferentes públicos.
O programa conta coa colaboración da Deputación da Coruña.
