O Goberno municipal de Muros levará ao pleno ordinario deste xoves, 28 de maio, a solicitude formal de desafectación da zona do paseo marítimo do Concello ante Portos de Galicia.
Trátase dunha petición motivada pola situación actual do paseo marítimo, que, segundo fixo saber a alcaldesa María Lago, “presenta un estado de conservación deficiente e require actuacións importantes de mellora e acondicionamento”.
“Na actualidade, o Concello está asumindo de maneira continuada o mantemento ordinario da zona, que inclúe a limpeza do espazo, podas, conservación das zonas verdes e pequenas actuacións de mantemento e coidado”, explica a alcaldesa de Muros, María Lago.
“Porén, ao non ser unha titularidade municipal, o Concello non pode executar unha actuación integral de reforma ou renovación do paseo marítimo, malia ser a administración que na práctica se encarga do seu mantemento diario”, engade.
Ademais, Portos de Galicia cobra unha taxa anual ao Concello de Muros pola ocupación deste espazo, a pesar dos custos que xa asume a administración local para a súa conservación.
Nos últimos meses, mantivéronse conversas informais con Portos de Galicia sobre esta situación, nas que xa se abordou a posibilidade de iniciar o procedemento de desafectación.
“Desde o Concello consideramos que esta é a vía máis lóxica e beneficiosa para poder actuar de maneira directa, planificada e integral sobre o paseo marítimo, garantindo un mellor estado de conservación e un mellor servizo para a veciñanza e para as persoas visitantes”, apunta María Lago.
Deste xeito, o obxectivo da solicitude é que “o espazo poida pasar a ser plenamente xestionado polo Concello de Muros, permitindo impulsar futuras actuacións de mellora e recuperación do paseo marítimo”.
