A Xunta de Goberno Local do Concello de Boiro deu luz verde ás obras para a reparación da cuberta do Centro Social de Cabo de Cruz, unhas actuacións que ascenden aos 203.999,93 euros e que contan co financiamento da Deputación da Coruña mediante o Plan de Obras e Servizos (POS+ Concellos).
Dende o Concello explican que “na actualidade o centro atópase nun estado de deterioro debido aos problemas estruturais, contando con filtracións de auga que impiden o desenvolvemento de arranxos e acondicionamento interior”. As actuacións programadas con este proxecto son “a reparación e impermeabilización da cuberta e selado de cubos que favorecen a filtración de auga”.
Tamén se vai a facer o arraxo dos accesos co levantado do pavimento e a impermeabilización así como a substitución de canelóns e baixantes de aluminio. A obra completarase no interior coa reposición do falso teito e reparación da pintura por humidades.
Segundo o Concello, estas obras son unha primeira fase para o arranxo íntegro do centro e eliminar así as filtracións de auga existentes e poder continuar cos arranxos interiores do mesmo. “Estamos a traballar nun programa para a renovación de todos os centros sociais do municipio que vai dende reparacións estruturais a pequenos arranxos para mellorar os servizos que se prestan nos distintos centros”, afirmou o alcalde, José Ramón Romero.
