Dende o Concello de Boiro anuncian que xa están a preparar os areais das súas praias pensando na tempada estival que xa se albisca e deixando atrás as fortes chuvias e temporais que trouxo o inverno. O primeiro paso deuse coa limpeza e acondicionamento da praia de Barraña para continuar en Carragueiros, a Retorta e Mañóns para seguir logo paseniño e de xeito progresivo por todos os areais e pequenas calas que posúe Boiro.
Informan dende o concello que se está a levar a cabo unha limpeza mecánica para retirar a capa de residuo depositada na superficie areosa a consecuencia das mareas e dos temporais do inverno, deixando chaira a superficie e limpándoa dos residuos traídos polo mar. Engadir que esta limpeza complétase durante a época estival coa retirada diaria (de xeito manual) dos residuos traídos a consecuencia das ditas mareas.
