A Plataforma pola Sanidade Pública do Barbanza informou de novas mobilizacións nesta recta final de maio e nos primeiros días de maio, dirixidas novamente a reclamar unha sanidade pública de calidade, tanto na comarca coma no resto de Galicia.
-Este xoves na Pobra celebrarase unha asemblea ás 20:00, no Teatro Cine Elma para “analizar a situación” sanitaria no concello. “Estamos a espera da resposta da Valedora do pobo”, indican dende a Plataforma.
-Este xoves haberá tamén unha concentración ás 12.00 horas no Centro de Saúde de Ribeira. Segundo confirman dende Plataforma, “continúan sen cubrir unha praza de tarde de medicina de familia e outra de tarde de enfermería de adultos”.
-Este venres 28 de maio ás 11:30 celebrarase unha concentración en Aguiño pola cobertura da praza de medicina de familia no Centro de Saúde que leva sen cubrirse dende novembro, e ás 12 na Pobra pola apertura do PAC de tarde os días laborais.
-O martes 2 de xuño ás 19 horas convocouse unha concentración en Rianxo, pola apertura do PAC de tarde os días laborais.
-Ademais, o xoves 4 haberá concentracións en toda a xeografía galega para denunciar as listas de agarda hospitalarias. A nosa será ás 12 no hospital.
Como vén sendo habitual, boa parte dos actos programados inclúen a lectura de manifestos en defensa dun sistema sanitario público, universal e de calidade, que porán o foco na precariedade do servizo sanitario na comarca do Barbanza, que, segundo denuncian dende a plataforma, “levan anos sufrindo falta de medios e persoal” e “precisan medidas urxentes da Consellería de Sanidade para emendar unha situación, de por si crítica, que se agrava coa chegada inminente da poboación turista”.
Entre as principais queixas figuran a falta de médicas/os de familia, o colapso nas citas de atención primaria, a redución de servizos no hospital comarcal e a precariedade laboral do persoal sanitario. Os manifestantes tamén esixen máis recursos para a atención á saúde mental e unha maior cobertura nos centros periféricos.
