O subdelegado do Goberno na Coruña, Julio Abalde, visitou este luns 4 de maio, o hórreo de Carnota acompañado polo alcalde do municipio, Juan Manuel Saborido, e pola concelleira de Servizos Sociais, Igualdade, Benestar, Xuventude, Infancia e Educación, María Mercedes Noceda, para poñer en valor un dos grandes símbolos do patrimonio popular galego.
A visita produciuse tras a recente aprobación polo Consello de Ministros do Real Decreto polo que os hórreos do norte da península ibérica foron declarados Manifestación Representativa do Patrimonio Cultural Inmaterial, recoñecendo así o seu papel como vehículos de transmisión cultural e expresión simbólica das identidades colectivas.
Julio Abalde destacou que “os hórreos forman parte da nosa memoria colectiva e representan a unión entre tradición, territorio e comunidade”. Neste sentido, subliñou que esta declaración “permite protexer non só as construcións, senón tamén os saberes, os usos sociais e os vínculos emocionais que as rodean”.
Lembrou que o hórreo de Carnota é unha das imaxes máis recoñecíbeis do municipio e un dos principais atractivos turísticos da comarca. Construído en 1768 e ampliado en 1783, conta con 34,76 metros de lonxitude e 22 pares de pés, o que o converte no máis grande do “estilo Noia” en Galicia. Declarado Monumento Nacional, recibe cada ano milleiros de visitantes.
Recordou tamén que no conxunto do concello de Carnota están inventariados arredor de 900 hórreos, “mostra da profunda vinculación deste territorio coa arquitectura tradicional e coa cultura agraria.” Xunto ao de Carnota, destaca tamén o hórreo de Lira, outro dos grandes referentes patrimoniais do municipio. No Barbanza, merece tamén distinción o de Araño (Rianxo), que é, de entre todos os estilos, o máis longo de toda Galicia (36’75 metros a cámara e 37’05 m o celeiro).
O subdelegado lembrou que estas construcións naceron para gardar e conservar as colleitas, protexéndoas da humidade e dos animais, mais hoxe representan tamén “un legado vivo que conecta xeracións e reforza a identidade local e galega”. Julio Abalde puxo en valor o compromiso dos veciños e veciñas e das administracións coa conservación deste patrimonio, e asegurou que “preservar os hórreos é preservar unha forma de entender a nosa historia e o noso futuro”.
