Este xoves 28 de maio o escritor Juan Galán vai presentar en Rianxo, no Auditorio Municipal, o libro Rotspanier (Galaxia), a historia dun exiliado republicano do Barbanza en Francia que fuxiu de Franco para caer nas mans de Hitler. Intervirán Juan Galán, autor, Néstor Sieira, membro da Comisión pola Recuperación Histórica da Barbanza, e Julián Bustelo, alcalde de Rianxo. O acto dará comezo ás 19.30 horas no salón de actos do Centro Sociocultural-Auditorio de Rianxo.
Organiza a CRHB en colaboración co Concello de Rianxo, a Asociación Cultural Barbantia e a Editorial Galaxia.
Ficha do libro (Galaxia)
Juan Galán recolle en Rotspanier a peripecia vital de Joaquín Fernández Millán, mariñeiro de profesión da Pobra do Caramiñal, emigrado ao País Vasco na década de 1920, que loitou como miliciano no Exército de Euskadi.
Como tantos outros españois, a inicios de febreiro de 1939 cruzou os Pirineos para exiliarse en Francia, onde sería internado en campos de concentración durante a Segunda Guerra Mundial, forzado a traballar en compañías de traballo (CTE e GTE) na zona controlada polo Goberno de Vichy, e, posteriormente, para a Organización Todt, na zona ocupada polos nazis, na construción do Muro Atlántico.
É esta unha obra de grande interese pola información que nos proporciona sobre eses miles de republicanos (os Rotspanier) que fuxiron de Franco para caer nas mans de Hitler.
