O Campeonato de España ILCA Máster arrancou este venres en Portosín cunha xornada marcada polas dificultades meteorolóxicas na ría de Muros e Noia. A ausencia de vento estable impediu completar manga ningunha, tras máis de sete horas de espera no campo de regata.
As condicións no mar non foron doadas, cun vento moi rolón que complicou desde o inicio o montaxe do circuíto. O Comité de Regata tentou ata o final validar unha proba, pero a caída total do vento na recta final da xornada obrigou a dar por concluído o primeiro día sen resultado puntuable.
Os regatistas, acostumados a este tipo de situacións, colaboraron en todo momento coa organización. No caso de que este sábado se poida completar unha manga, contarase xa para a clasificación final, xunto coas que se disputen durante o resto do campionato.
A competición está organizada polo Real Club Náutico Portosín, coa colaboración da Real Federación Galega de Vela, a Secretaría Xeral para o Deporte da Xunta de Galicia, o Concello de Porto do Son, Escora, Gadis, Coca-Cola e a Cofradía de Pescadores de Portosín.
